MARÍN. CON ACENTO GALEGO. CONXUNCIÓN LITERARIA-POÉTICA-MUSICAL CONMEMORATIVA DO DIA DAS LETRAS GALEGAS

Dibujo: Xurxo Lobato

Esta fin de semana gozaremos en Marín dun acontecemento cal se fose unha conxunción planetaria, ese fermoso momento que se produce cando os planetas aparecen xuntos no ceo. Algo así ocorrerá entre os días, venres 16, sábado 17 e domingo 18, ao coincidir as numerosas actividades programadas, aínda que paralelamente, polo Concello de Marín (concellería de Cultura) o Ateneo Santa Cecilia e a A. C. Almuinha, para conmemorar o Día das Letras Galegas.

Dunha parte destaca en primeiro lugar a proclamación de ‘Marin Vila de Libro’, unha interesante e acertada aposta do Goberno Local na que se funden literatura, poesía, música e artesanía, co obxectivo de promover a lectura que tanta falta fai nestes momentos.

“O Marín Vila de Libro’ é unha iniciativa que propón un festival literario ao grande coa pretensión de convertelo nun referente cultural da fin de semana das Letras Galegas” segundo sostén a alcaldesa María Ramallo.

Por outra banda non podemos deixar de poñer o acento no II Festival das Letras que organiza a A. C. Almuinha e o colectivo Mocidade polo Cambio co que homenaxearán ás cantareiras cunha celebración popular de música tradicional, poesía e participación comunitaria o sábado 17 ás 19.30h na  praza da Veiguiña, onde se entrelazan a música tradicional galega, poesía contemporánea, os ritmos urbanos e o rock coa participación activa da veciñanza.

E xa por último convén sinalar que o venres ás 20:00h no IES illa de Tambo o Ateneo Santa Cecilia celebra o Día das Letras Galegas coa entrega dos premios aos gañadores e gañadoras do concruso ‘Marín Conta’ en cada unha das categorías convocadas en Educación Primaria e na ESO. O acto, para o que a entrada e libre, contará coa actuación das Panderetiras-Cantareiras "AS FERRIÑAS".