MARÍN. DEBATE. A INICIATIVA DE 'ABRIR MARIN AO MAR" DEBE CONTAR CUN MÍNIMO CONSENSO. MARIA ADRIO, DEPUTADA DO PSOE

María Adrio (PSOE): "A Corporación Municipal é a lexítima representante da veciñanza e, como tal, correspóndelle impulsar calquera plan sobre un asunto tan importante para o municipio"

Xustificaciòn da abstención do PSdG-PSOE na votación a proposta do BNG, aprobada no Congreso, de 'Abrir Marín ao Mar' 

A deputada socialista María Adrio defendeu no Congreso que un proxecto orientado a abrir ‘Marín ao Mar’ debe contar “cun mínimo consenso” e ten que partir, ademais, desde o propio Concello. “A Corporación Municipal é a “lexítima representante da veciñanza” e, como tal, correspóndelle impulsar calquera plan sobre un asunto tan importante para o municipio.

No debate dunha iniciativa que partiu do Grupo Mixto, a parlamentaria do PSdeG explicou que os e as socialistas son favorables a que a cidadanía dispoña de máis espazo para o lecer ou para servizos na faixa litoral do municipio, mais apuntou que a proposta tería que contar “cun respaldo técnico sólido e acompañarse dun estudo orzamentario e de execución”.

De feito, o Grupo Municipal Socialista de Marín xa presentou este mesmo verán unha proposta sobre a fachada marítima, e móstrase receptivo a que a Administración local pida un estudo serio ao Goberno de España. 

María Adrio, deputada do PSdG-PSOE

María Adrio recordou que o Ministerio de Defensa vén colaborando co Concello. A Escola Naval xa mantén unha política activa de apertura á cidadanía, que inclúe xornadas de portas abertas, visitas guiadas e o uso compartido de instalacións deportivas, ás que se accede pola porta de Carlos I. Tamén sinalou que unha iniciativa para abrir ‘Marín ao Mar’ debe garantir “que non se prexudique a infraestrutura da Escola Naval”. Esta está aumentando o número de alumnos e alumnas, coa previsión de que esa tendencia se manteña. 

Por iso tamén se está estudando un incremento do plantel de cadros de mando, co fin de atender maiores necesidades en canto a alumnado. Segundo lembrou Adrio, a iso únese a evolución prevista no Centro Universitario da Defensa. Todo iso implicará “un proceso de redimensionamento interno” para poder atender ás novas necesidades docentes, loxísticas e de instrución, polo que haberá que ter en conta esa circunstancia.