MARÍN. NO DÍA DA MULLER. SEGUIMOS CON TODAS E PARA TODAS CON +IGUALDADE. POR MARÍA RAMALLO VÁZQUEZ. ALCALDESA DE MARÍN

8 de marzo de 1857. O incendio dunha fábrica de camisas de Nova York onde morreron 146 persoas marcou a loita polos dereitos da muller

Hoxe, 8 de marzo, Día Internacional das Mulleres, debe ser un día para alzar a voz de xeito unísono para pronunciar e deixar claro que estamos, todas e todos, aquí e en todo o mundo, comprometidas e comprometidos coa equidade de xénero e o benestar das mulleres. Senconfrontacións nin divisións innecesarias, debemos presentarnos unidas e unidos para reclamar unha vida diferente; unha vida na que as mulleres teñan as mesmas oportunidades que os homes, sen ningún tipo de discriminación, e non padezan a lacra das violencias machistas.

 

Pero hoxe non pode quedar en hoxe. Hoxe ten que ser os 365 días do ano. Procurar una sociedade en igualdade para mulleres e homes non pode quedar limitado a un só día. E esta é a nosa vontade desde que comezamos a gobernar na Deputación de Pontevedra: traballar todos os días e dende todas as áreas de goberno tendendo pontes cara a igualdade. Nestes oito meses, coido que imos polo bo camiño.

 

Temos conseguido aplicar os principios da igualdade de xeito transversal na nosa acción política. Apostamos pola igualdade no deporte, na cultura, na economía, na ciencia, na empresa, no sector primario ou, entre outras áreas, na educación a través de programas e proxectos concretos nos que devolver ás mulleres a posición histórica que noutros momentos se lles negou.

 

Tendemos pontes con outras administracións, como os concellos e a Xunta de Galicia para sumar sinerxías e camiñar, da man, para conseguir a igualdade real e efectiva. Tamén o estamos a facer co tecido asociativo provincial, que traballa día a día para construír un mundo máis xusto. Facémolo con programas específicos, con axudas económicas, con iniciativas pensadas por e para as mulleres, dándolles voz, escoitándoas, abríndonos a diferentes perspectivas e puntos de vistas e espallando os principios da igualdade por toda a contorna da nosa provincia.

 

Foi unha das promesas do presidente Luis López na súa toma de posesión e queda claro que, nestes oito meses, o compromiso coa equidade de xénero e o benestar das mulleres do goberno provincial é irrenunciable. Tamén queda claro que apostamos e imos seguir apostando pola igualdade como un espazo amplo, cómplice e aberto a todas e a todos, sen divisións innecesarias. E que esas pontes que estamos a tender cos concellos, con outras administracións e a sociedade pontevedresa estanse erixindo fortes para poder seguir camiñando cara un mundo no que mulleres e homes teñan as mesmas oportunidades.

 

Somos moi conscientes de que o mundo non pode avanzar se continúa habendo desigualdades de xénero. Somos tamén moi conscientes de que sen igualdade real e efectiva de mulleres e homes non hai dereitos nin liberdades para ninguén. E, por iso, este 8M seguimos con todas, para todas, con +Igualdade.